Rekstur bensínstöðva Shell og Select, sem hafði verið í höndum 10-11, kom aftur til Skeljungs.
Sölulager var opnaður að Hólmaslóð 10 til að auðvelda viðskiptavinum að nálgast þær helstu vörur sem Skeljungur selur. Þá hófst sala á Shell V-Power 99 oktana bensíni á ný eftir nokkurt hlé. Shell V-Power er með hæstu oktantölu sem boðin er á almennum markaði. Enginn annar framleiðandi býður sambærilegt blýlaust bensín og Shell V-Power.
Ný Shell kort fyrir stúdenta, svokölluð afsláttarkort, fóru í dreifingu til nemenda við Háskóla Íslands, Háskólann á Bifröst og Háskólann í Reykjavík.
Að venju tók Skeljungur þátt í að styrkja hin ýmsu verkefni. Í kjölfar þess að Styrktarfélag krabbameinsveikra barna fékk bíl til afnota í eitt ár ákvað Skeljungur að styrkja félagið með fríu eldsneyti. Skeljungur kostaði útsendingar Formúlu 1 í Sjónvarpinu fjórða árið í röð. Þá var gert samkomulag við Öryrkjabandalag Íslands um að veita öllum félagsmönnum sjálfsafgreiðsluafslátt af eldsneyti afgreitt með fullri þjónustu á Shell stöðvunum um allt land.
Skeljungur og Umferðarstofa undirrituðu í maímánuði samstarfssamning vegna verkefnisins Vel á vegi stödd í vinnunni. Verkefnið miðar að bættum akstursháttum bílstjóra hjá fyrirtækjum sem eru með marga bíla í rekstri og í daglegri umferð.
Skeljungur stóð fyrir skemmtilegum sumarleik fyrir börn í samstarfi við Latabæ. Vikulega voru dregnir út 50 vinningshafar en aðalvinningar sumarsins voru 10 sérmerkt Latabæjarreiðhjól.