Margt hefur verið gert til gamans umfram þá keppni sem átt hefur sér stað milli liða í fótbolta. Svo fátt eitt sé nefnt var hið hefðbundna kappát og nammipokakeppnin. Víkingsmenn úr Reykjavík unnu kappátið en þar var mjög svangur ungur matur sem át sinn skamm á aðeins 1,01 mínútu. KA menn unnu aftur á móti nammipokann stóra en þeir voru næstir því að giska á fjölda stykkja í stútfullum nammipoka sem keppt var um.
Colorado Rush, gestalið mótsins, vann boðhlaupið í ár og voru stoltir af frammistöðunni. Einnig fór fram spurningakeppni á milli liða. Átta lið svöruðu öllu rétt en aðeins var eitt sigurlið dregið út og voru það liðsmenn í Fram sem hlutu þann heiður.
Auk alls þessa var hápunkturinn, landsliðsleikurinn, leikinn á föstudaginn. Í landsliðið eru bestu keppendur mótsins valdir og er það mikill heiður. Í gegn um tíðina hafa margir okkar bestu knattspyrnumanna keppt í þessum leik á Shellmótinu.
Eyjamenn létu sitt ekkert eftir liggja og buðu öllum liðum í rútuferð um Eyjuna og í siglingu. Þetta vakti mikla lukku. Einhverjir skelltu sér jafnfram í sprang að eyjamanna sið. Á meðfylgjandi myndum má sjá þá stemmningu sem ríkti á Shellmótinu í ár.
Til hamingju með mótið og árangurinn, strákar!
Fleiri myndir og upplýsingar er að finna á www.shellmot.is