Vonir stóðu til að hér æki fljótlega um götur floti vetnisbifreiða enda Ísland með öll vopn á hendi til þess að verða frumkvöðull á sviði vetnisframleiðslu. Sá dagur gæti nú verið í augsýn, sjö árum eftir að verkefninu var hrundið í framkvæmd.
Japanski bílaframleiðandinn Honda hefur nú sett á markað fyrsta fjöldaframleidda bílinn sem notar vetni sem eldsneyti. Honda FCX Clarity var fyrst kynntur til sögunnar á bílasýningunni í Los Angeles árið 2007. Bíllinn var svo sýndur aftur nýverið og þá í framleiðsluútgáfu. Bíllinn kom á markað í Bandaríkjunum í fyrra og fengu 200 útvaldir viðskiptavinir að leigja bílinn af Honda.
Varla er hægt að segja annað en að bíllinn komi á hárréttum tíma til sögunnar en að baki liggur auðvitað mikið starf við að gera tæknina aðgengilega fyrir fjöldaframleiðslu. Þrýstingurinn er hins vegar orðinn það mikill á Honda að vonast er til að strax á næsta ári verði hægt að auka við framleiðsluna og leigja út fleiri bíla.
Ekki er búist við því að FXC hugmyndin verði komin í almenna sölu fyrr en eftir nokkur ár því bíllinn er enn of dýr. Honda FCX Clarity var nýlega valinn grænasti bíll í heimi á alþjóðlegu bílasýningunni í New York en verðlaunin komu á sama tíma og Honda upplýsti um rannsóknir sem hafa miðað að því að meta tæknina fyrir evrópskar aðstæður með grunnkerfi vetnisstöðva í huga.
Stytt grein úr Morgunblaðinu 8. maí 2009.